ინდაურის საცივი — რეცეპტი

საგულდაგულოდ გატრუსული და კარგად გარეცხილი მთლიანი ინდაური მოათავსეთ დიდ ქვაბში, დაასხით წყალი და მოხარშეთ სანახევროდ. ხშირი ინტერვალით მოხადეთ ქაფი, ხოლო ზედაპირზე ამოსული ცხიმი შეინახეთ ხახვის მოსაშუშად. ნახევრად მოხარშული ინდაური ამოიღეთ, მოაყარეთ მარილი, მოათავსეთ საცხობ ლანგარზე და შეწვით ღუმელში 180 გრადუსზე ოქროსფერ შეფერილობამდე. შემდეგ გააგრილეთ და დაჭერით სასურველი ზომის ნაჭრებად. ინდაურის წვის პროცესში ბულიონს მოხადეთ ზედმეტი ცხიმი, კარგად გადაწურეთ და გააგრილეთ. ძალიან წვრილად დაჭრილი ხახვი მოშუშეთ ინდაურის ცხიმში დაბალ ცეცხლზე, სანამ სრულიად არ დარბილდება და გამჭვირვალე არ გახდება (არ უნდა დაიბრაწოს!!!). ნიგოზი და ნიორი სამჯერ გაატარეთ ხორცსაკეპში. ხელით კარგად მოზილეთ, რომ ზეთი გამოუვიდეს და გადაინახეთ. შემდეგ ნიგოზს შეურიეთ ყველა სუნელი: ქინძი, უცხო სუნელი, ყვითელი ყვავილი, მიხაკი, მარილი და წიწაკა. ნიგვზიანი მასა ქვაბში ნელ-ნელა შეურიეთ თბილ ბულიონს და კარგად გახსენით. დაუმატეთ მოშუშული ხახვი, ინდაურის ნაჭრები და დადგით დაბალ ცეცხლზე. წამოადუღეთ, კოვზით უწყვეტად ურიეთ და ადუღებიდან 5-7 წუთში დაუმატეთ ძმარი, გამორთეთ ცეცხლი და დატოვეთ გასაციებლად. სუფრაზე მიტანისას თავზე მოასხით თავისივე ნიგვზის ზეთი.