ძროხის ფარშის რულეტი — რეცეპტი

ხორცსაკეპ მანქანაში გაატარეთ ხახვი, კარტოფილი და სტაფილო. ძროხის ფარშს დაამატეთ 1 კვერცხი, მარილი, გატარებული ხახვი, კარტოფილი, სტაფილო და ყველაფერი კარგად მოზილეთ ერთგვაროვანი მასის მიღებამდე.

მოხარშეთ 3 კვერცხი, გააციეთ და გაფცქვენით. საცხობ ქაღალდზე ოთხკუთხედად გაანაწილეთ ფარში და ზედ სიგრძივად მიყოლებით დაალაგეთ 3 მოხარშული კვერცხი (ერთმანეთზე მიბჯენით). შემდეგ საცხობი ქაღალდის მეშვეობით ფარშის ნაპირებით დაფარეთ კვერცხები ისე, რომ მიიღოთ რულეტი (დაახლოებით ისე, როგორც ამზადებენ სუშის როლებს).

მიღებული რულეტი გადაახვიეთ ფოლგაში, მოათავსეთ საცხობ ლანგარზე და გამოაცხეთ 180°-მდე გახურებულ ღუმელში 40 წუთით. ამის შემდეგ გამოიღეთ ღუმელიდან, მოხსენით ფოლგა ზემოდან და შედგით ღუმელში კიდევ 10-15 წუთით, რომ რულეტი შეიბრაწოს. გემრიელად მიირთვით.