ბოცვრის დიეტური რულეტი ბოსტნეულით — რეცეპტი

ბოცვრის ხორცს მოაშორეთ ძვლები და გაატარეთ ხორცსაკეპ მანქანაში. გაყინული მწვანე ბარდა მოწალეთ მარილიან ადუღებულ წყალში 2 წუთის განმავლობაში და მაშინვე გადაიტანეთ ყინულიან წყალში, ერთი წუთის შემდეგ წყალი გადაღვარეთ, ხოლო ბარდა გადაიტანეთ თასში ბოცვრის ფარშთან.

სტაფილო გაასუფთავეთ და გაატარეთ ხორცსაკეპ მანქანაში. დაუმატეთ ფარშს და იქვე დაამატეთ ხორცსაკეპში გატარებული თავი ხახვი და ნიორი. ტკბილი ბულგარული წიწაკა გარეცხეთ, მოაცილეთ შიდა ტიხრები თესლთან ერთად, ხოლო რბილობი დაჭერით პატარა კუბებად და დაამატეთ თასში დანარჩენ ინგრედიენტებს.

ინგრედიენტებიან თასში ჩაახალეთ ქათმის ორი კვერცხი, მოაყარეთ კარტოფილის სახამებელი, დაამატეთ მარილი და დაფქული შავი პილპილი გემოვნებით. მიღებული მასა გულდასმით აურიეთ, რომ ფარში ერთგვაროვანი გამოვიდეს.

საცხობ სახელოს შიგნიდან წაუსვით მზესუმზირის რაფინირებული ზეთი და გადაიტანეთ მასში მომზადებული ფარში. ფარშს მიეცით პურის (ბატონის) ფორმა და კიდეები მჭიდროდ შეუკარით (კანფეტის მსგავსად). საიმედოობისთვის რულეტი მოათავსეთ კიდევ ერთ პოლიეთილენის პარკში და მასაც შეუკარით პირი.

დიდ ქვაბში ჩაასხით წყალი და მიიყვანეთ ადუღებამდე. ჩაუშვით რულეტი ადუღებულ წყალში და ხარშეთ 30-40 წუთის განმავლობაში (პერიოდულად გადააბრუნეთ ერთი მხრიდან მეორეზე). მზა რულეტი ამოიღეთ ქვაბიდან, გააგრილეთ და გაათავისუფლეთ გარსისგან. ბოცვრის დიეტური რულეტი ბოსტნეულით მზადაა! დაჭერით ნაჭრებად და მიირთვით თბილ ან გაგრილებულ მდგომარეობაში.