ბოცვერი არაჟნის სოუსში — რეცეპტი

ამ კერძის მოსამზადებლად ბოცვრის ხორცი გარეცხეთ და დაჭერით სასურველ ნაჭრებად, თითოეულ ნაჭერს კარგად შეაზილეთ მარილი და შავი პილპილი გემოვნებით. თასში ჩაყარეთ ფქვილი და ხორცის ყველა ნაჭერი კარგად ამოავლეთ მასში. ტაფაზე გააცხელეთ მზესუმზირის ზეთი, მაღალ ცეცხლზე შებრაწეთ ბოცვრის ნაჭრები და გადაიტანეთ სქელძირიან ქვაბში.

სტაფილო გარეცხეთ, გააცალეთ კანი და დაჭერით პატარა კუბებად. ხახვიც გაფცქვენით და დაჭერით ალყა-ალყა. იმავე ტაფაში სადაც ბოცვერი იწვებოდა, მოშუშეთ ხახვი და სტაფილო, თან დროდადრო ურიეთ, სანამ ხახვი არ კარამელიზირდება. დაამატეთ არაჟანი და ცხელი წყალი, გადაურიეთ და მიიყვანეთ სოუსი ადუღებამდე. ადუღეთ 2 წუთი და გადადგით ტაფა ქურიდან.

სტაფილოს, ხახვისა და არაჟნის სოუსი გადაიტანეთ ქვაბში, სადაც მანამდე შემწვარი ბოცვვრის ხორცი ჩააწყვეთ, შემოდგით ქურაზე და სოუსის ადუღების შემდეგ შუშეთ თავდახურული, დაბალ ცეცხლზე, 45 წუთის განმავლობაში, ან მანამდე, სანამ ბოცვრის ხორცი არ გახდება რბილი და ნაზი. მზადყოფნამდე ერთი წუთით ადრე კერძს დაამატეთ დანაყილი ნიორი, პიკანტური გემოსა და არომატისათვის და ბოცვერი არაჟანში მზად არის.