რაჭული ლობიანი ლორით — რეცეპტი

თბილ წყალში გახსენით საფუარი და შაქარი. ფქვილს მოაყარეთ მარილი, დაუმატეთ საფუვრიანი წყალი და მოზილეთ რბილი, ნაზი ცომი. ბოლოს ხელებზე დაისხით ზეთი და ცომი კიდევ 3 წუთის განმავლობაში მოზილეთ, სანამ სრულიად გლუვ ტექსტურას არ მიიღებთ. ცომი მოათავსეთ თასში, დააფარეთ ტილო და დატოვეთ ასაფუებლად თბილ ადგილას 1 საათის განმავლობაში.

გადარჩეული და გარეცხილი ლობიო და რაჭული ლორი ერთად მოათავსეთ ქვაბში, დაასხით წყალი და მოხარშეთ სრულ ჩახარშვამდე. ლორი ხარშვისას მარილს გამოყოფს, ამიტომ შესაძლოა სულ არ დაგჭირდეთ ლობიოსთვის მარილის დამატება. აუცილებლდ გასინჯეთ და თუ საჭირო იქნება მარილი, მხოლოდ მაშინ დაამატეთ.

ქვაბიდან ამოიღეთ მოხარშული ლორი, მოაცილეთ ძვლები და ხორცი ძალიან წვრილად დაჭერით. ცხელი ლობიო საჭყლეტით კარგად ჩაზილეთ პიურეს კონსისტეციამდე, შეურიეთ დაჭრილი ლორი და მისივე ცხიმი. როდესაც მასა გაგრილდება, დაყავით ორ ნაწილად და გააკეთეთ დიდი გუნდები.

აფუებული ცომი გაყავით ორად. ხელით ოდნავ გააბრტყელეთ, შუაში ჩაუდეთ ლობიოს და ლორის გუნდა, ნაპირები თავზე მჭიდროდ მოუკარით, გადააბრუნეთ ნაკერით ქვემოთ და ხელით ფრთხილად გააბრტყელეთ, მიეცით ტრადიციული, თხელი ლობიანის ფორმა.. გამოაცხვეთ მშრალ, კარგად გახურებულ ტაფაზე საშუალო ცეცხლზე ორივე მხრიდან ან ღუმელში 230 გრადუსზე. ცხელსვე უხვად წაუსვით ნაღების კარაქი ან ლორის ქონი.