მთიულური ხინკალი — რეცეპტი

დიდ ჯამში ჩაყარეთ ფქვილი და გააკეთეთ ჩაღრმავება. ცივ წყალში გახსენით მარილი და ნელ-ნელა ჩაასხით ფქვილში. მოზილეთ ძალიან მკვრივი და მაგარი ცომი. თავიდან მოზელა გაგიჭირდებათ, მაგრამ არ დაამატოთ ზედმეტი წყალი — რაც უფრო მაგარია ცომი, მით უკეთესად შეინარჩუნებს წვენს ხარშვისას და არ გაიხევა. ცომი კარგად დაამუშავეთ ხელით, შეახვიეთ საკვებ ცელოფანში და დაასვენეთ 30-40 წუთით. დასვენების შემდეგ ცომი უფრო ელასტიკური გახდება.

საქონლისა და ღორის ხორცი კარგად გარეცხეთ, დაჭერით და ხახვთან ერთად გაატარეთ ხორცსაკეპ მანქანაში (ტრადიციულად ხორცს კეპავდნენ, თუმცა გატარებულიც შესანიშნავი გამოდის). ხორცის ფარშს დაამატეთ მარილი და ბლომად შავი პილპილი. ნელ-ნელა დაუმატეთ ფარშს ცივი წყალი და კარგად გადაურიეთ, რომ ხორცმა წყალი სრულად უნდა შეიწოვოს. ფარში უნდა გახდეს ერთგვაროვანი, ფაფუკი და ოდნავ თხევადი (სწორედ ეს წყალი იქცევა ხინკლის უგემრიელეს წვენად).

დასვენებული ცომი გააბრტყელეთ დაახლოებით 1 სმ სისქის ფენად და სპეციალური ფორმით ან ჭიქით გამოჭერით პატარა წრეები. თითოეული პატარა წრე სათითაოდ გააბრტყელეთ თხელ ფირფიტად (ცენტრი შედარებით სქელი დატოვეთ, ხოლო ნაპირები კარგად გაათხელეთ). ფირფიტის ცენტრში მოათავსეთ 1 სუფრის კოვზი ფარში. ასწიეთ ცომის ნაპირები და დაიწყეთ ხინკლის მოხვევა (რაც მეტი ნაოჭის გაკეთებას მოახერხებთ, მით უკეთესი და ლამაზი ხინკალი გამოგივათ). ბოლოში ნაოჭებს ცენტრში ერთად მოუყარეთ თავი, მაგრად მოუჭირეთ თითები ისე რომ დიდი „კუჭი“ არ გამოგივიდეთ (ზედმეტი ცომი მოაშორეთ).

ამასობაში, სანამ ხინკალს მოახვევთ, დიდ და განიერ ქვაბში აადუღეთ ბევრი წყალი და ჩაყარეთ ბლომად მარილი.

როგორც კი საჭირო ოდენობის ხინკალს მოახვევთ, მდუღარე წყალს კოვზით წრიულად მოურიეთ, რომ მორევის ეფექტი შეიქმნას და სათითაოდ ჩაუშვით ხინკლები ქვაბში კუჭებით ზემოთ. თავდაპირველად გლუვპირიანი ქაფქირით ფრთხილად ურიეთ ქვაბის ფსკერზე, რათა ხინკალი არ მიეკრას. როდესაც ხინკლები ზედაპირზე ამოტივტივდება და მუცლით ზემოთ გადაბრუნდება, ადუღეთ კიდევ 7-8 წუთი.

ამოღებამდე ქვაბში ჩაასხით ერთი ჭიქა ცივი წყალი (ეს დუღილს შეაჩერებს, ცომს შეკრავს და ხინკალს უფრო პრიალას გახდის). ხინკალი ფრთხილად ამოიღეთ ქაფქირით დიდ ლანგარზე, მოაყარეთ შავი პილპილი და მიირთვით დაუყოვნებლივ, სანამ ცხელია!